Kajl Uoker ka bërë një kthesë të papritur dhe do të rinovojë kontratën me Mançester Sitin, pavarësisht se kishte një marrëveshje verbale me Bajernin e Mynihut për t’u transferuar te rekordmenët e Gjermanisë këtë verë.
Mbrojtësi i djathtë i “qytetarëve” refuzoi fillimisht që të rinovonte kontratën në “Etihad”, e cila skadon verën e ardhshme, por pas bisedimeve me Pep Guardiolën, ku gjatë javës së fundit ata darkuan në një restorant japonez në Mançester, anglezi është bindur të vazhdojë me fituesit e tripletës, sipas “The Athletic”.
Pep Guardiola ka këmbëngulur që Uoker të mos largohet dhe e konsideron mbrojtësin si pjesë të rëndësishme të skuadrës së tij bashkë me Bernardo Silvën.
Në ndeshjet e fazës përgatitore të sezonit të ri, por edhe në ndeshjen e fundit të finales së Superkupës së Anglisë kundër Arsenalit, trajneri 52-vjeçar i dorëzoi edhe shiritin e kapitenit mbrojtësit.
PANORAMASPORT.AL
