Na ndajnë vetëm dy ditë nga nisja e Serisë A dhe ethet e garës kanë nisur të ndihen. Skuadra për t’u mundur është padyshim Napoli, kampionia në fuqi, që do të bëjë maksimumin për të ruajtur kurorën.
Me një trajner të ri si Rudi Garsia napolitanët e dinë se nuk do ta kenë të thjeshtë të përsërisin një sezon fenomenal si ai i shkuari, mbi të gjitha kur rivalët janë të egër. Interi, Milani, Juvja, por edhe Roma e Lacio janë aty për të kërcënuar Napolin, që të shtunën pasdite do të zbresë i pari në fushë ndaj Frozinones. Zikaltrit do të përballin Monzën po mbrëmjen e së shtunës, për t’ua lënë radhën sfidave të tjera.
Por ndërkohë që sfidat e para mes pretendentëve do t’u përkasin pikërisht Interit e Napolit, mes tyre duket se do të diskutohet edhe titulli. Sipas superkompjuterit të “Opta”-s, do të jetë në fakt ekipi i Inzagit, që do të kryesojë në fund të sezonit renditjen për të fituar kështu yllin e dytë në fanellë, i ndjekur nga napolitanët. Në vendin e tretë dhe të katërt parashikohen të pozicionohen respektivisht Milani dhe Juventusi, që do të marrin pjesë në Ligën e Kampioneve, të ndjekur nga Lacio, Roma e Atalanta si pjesëmarrëse në kompeticionet europiane.
GOLASHËNUESIT – Gara do të diskutohet mes Interit dhe Napolit, që sigurisht që për të vendosur duart te trofeu do të kenë nevojë mbi të gjitha për golat e sulmuesve të tyre. Ashtu si një sezon më parë, Lautaro e Osimhen do të jenë udhëheqësit e skuadrave dhe mes dyshes pritet të vendoset edhe titulli i golashënuesit, me të fundit që i shkoi nigerianit. Sipas koeficienteve, sulmuesi i Napolit është sërish favorit për të fituar dhe kuotohet me 3, ndërkohë që shpallja e Lautaros golashënues kuotohet me 3.65. Dushan Vlahoviç (7), Çiro Imobile (8), Domeniko Berardi (15) e Rafael Leao (17) janë sulmuesit e tjerë që do të synojnë “Këpucën e Artë”.
NISLI GJINI-PANORAMASPORT.AL
