Ish-drejtori dhe anëtari i bordit të Interit, Jun Liu, raportohet se është arrestuar nën akuzën për korrupsion në Kinë.
46-vjeçari ka shërbyer më parë si president i Jiangsu Suning dhe ishte CEO i përkohshëm i “Nerazzurrëve”, duke qenë anëtar i bordit nga qershori 2016 deri në tetor 2018.
Beijing Youth Daily dhe Calcio e Finanza detajojnë se si arrestimi i Liu vjen gjashtë muaj pasi presidenti i federatës kineze Chen Xuyuan u vu nën hetim për gjoja kryerjen e shkeljeve të rënda të ligjit.
Autoritetet kineze po punojnë për një rast anti-korrupsion, të lidhur me futbollin. Në janar, dy ish-zyrtarë të federatës u hetuan gjithashtu për të njëjtat arsye.
Në mars, dy zyrtarë të tjerë të shquar të federatës kineze, Wang Xiaoping, drejtor i komitetit disiplinor dhe Huang Song, kreu i departamentit të garave, u vunë gjithashtu nën hetime për shkelje të rënda të ligjit./Lajmi.net/
