“Një lamtumirë e Berardit në janar? Nuk e përjashtoj kurrsesi, ndonëse nuk është se klubi ynë ka nevojë që ta bëjë këtë gjë për të arkëtuar. Jemi ndër të paktat klube që nuk kemi probleme financiare. Madje, po ju zbuloj se me Juven u bë gati edhe kontrata në merkaton e verës, por sfumoi për disa arsye”.
Me këto fjalë, administratori i deleguar i Sasuolos, Xhovani Karnevali, ndez sfidën e pasdites së sotme me Juven. Transferta e sotme bardhezi do të jetë një mundësi për torinezët që të vlerësojnë edhe njëherë tjetër mundësinë e blerjes së Berardit, pasi kujtojmë që ky i fundit për të shkuar te Juvja edhe u vetëpërjashtua për disa ditë nga skuadra. Dhe ndoshta, dita e firmës do të jetë merkatoja e janarit, siç nënvizoi edhe Karnevali.
Por lidhur me këtë argument, edhe trajneri Masimiliano Alegri nuk fshihet: “Unë nuk jam nga ata tipa që gënjejnë dhe po ju them se në gusht kishte disa tratativa në prag mbylljeje dhe njëra prej tyre ishte me Berardin. Por se çfarë do të ndodhë në të ardhmen unë nuk di. E vetmja gjë që shpresoj është që Berardi të mos jetë në një ditë të mirë kundër nesh dhe do të më mjaftojë për të qenë i lumtur”, tha Alegri.
PANORAMASPORT.AL
