Pas 278 ditësh mungesë në fushën e blertë, “bomberi” shqiptar Armando Broja u rikthye të dielën në përballjen ndaj Aston Villa, duke i dhuruar një fije shprese tifozëve të Chelsea, se diçka mund të ndryshojë në majën e sulmit me rikthimin e tij.
Mirëpo, tekniku Mauricio Pochettino nuk dëshiron të rrezikojë një dëmtim tjetër e për këtë arsye ka vendosur që në sfidën e radhës në EFL Cup, ndaj “pulëbardhave” të Brighton ta lërë në stol “legjionarin”, teksa një gjë të tillë e konfirmoi në konferencën për shtyp në prag të përballjes, të së mërkurës.
“Ai nuk është i gatshëm ta nisë si titullar. Ai po e ndihmon skuadrën dhe po bën mirë, por atij i nevojitet kohë që të jetë përsëri në formë që të jetë në gjendje që të nisë një ndeshje nga fillimi. Mendoj për 20, 25, 30 minuta ai është në gjendje të ndihmojë ekipin, por nuk është ende në gjendje ta nisë nga fillimi”,- theksoi trajneri i “bluve”. /i.m /abcnews.al
