Ndeshja mes Xhenoas dhe Milanit është mbyllur me fitoren 1-0 të kuqezinjve. Por kanë shpërthyer menjëherë polemikat për golin e minutave të fundit që u dha suksesin kuqezinjve. Kristian Pulisiç shënoi golin e vetëm të ndeshjes, në një aksion ku ai dukej se prekte topin me dorë para se të gjuante në portë.
Ky episod ka bërë të shpërthejnë kritikat në rrjetet sociale dhe sipas ekspertit të moviolës së “Sky Sport”, ish-gjyqtarit Luka Mareli ka një arsye pse VAR-i nuk mund ta cilësonte të parregullt golin.
“Goli i Pulisiç është një nga misteret qesharake të futbollit. Kemi parë të gjitha këndvështrimet në dispozicion dhe nuk ekziston një që tregon me qartësi prekjen me dorë. Mund ta perceptojmë si të tillë, por nuk ka sigurinë, ndaj VAR-i nuk mund të ndërhyjë.
Nga një këndvështrim duket sikur me shumë mundësi e prek me dorë, por problemi është që në këtë episod, në sallën e VAR-it duhet siguria e plotë e prekjes. E di që do të diskutohet, por kështu është protokolli”, tha Mareli.
PANORAMASPORT.AL
