Padyshim kur përmendim skuadrën e Milan, emri i parë që na vjen në mendje është ai i “ylli” portugez, Rafael Leao, mirëpo “luzitani” ende nuk i ka ndezur “motorët” për këtë sezon, duke arritur të shënojë vetëm 3 gola e të asistojë 4 të tjerë, në 10 përballjet e para të këtij edicioni.
Për “yllin” portugez të shumta kanë qenë kritikat, nga ish-tekniku “legjendar” italian, Arrigo Sacchi, i cili vetëm pak ditë më parë njoftoi se “luzitani” nuk do të ishte kurrë titullar në formacionin e tij, mirëpo duket se kritikat nuk janë ndalur me kaq, me ish-teknikun e “kuqezinjve”, që këtë herë ka folur për performancën e Leao ndaj Juventus, ku ishte pothuajse “i padukshëm” përgjatë 90 minutave të lojës.
“Leao ka cilësi të jashtë zakonshme, por pas 4 sezonesh te Milani, mund të themi se nuk i ka shfrytëzuar ato.Ai ose është vendimtar, ose nuk bën asgjë në fushë. Në futboll luhet me 11 persona dhe gjithsecili duhet të bëjë punën e tij. Nëse njëri çedon, atëherë e gjithë skuadra vuan. Leao duhet ta kuptojë se duhet të bëhet pjesë e grupit dhe të sakrifikojë, pasi vetëm kështu mund të shndërrohesh në lojtar të madh”, deklaroi Sacchi. /i.m /abcnews.al
