Fitore emocionuese e Juventusit në sekondën e fundit të shtesës përballë Veronës, në “Allianz Stadium”. Për minuta të tëra bardhezinjë e kishin kërkuar me ngulm golin, madje iu anuluan dy gola, por festa do të ndizej pikërisht kur tabela elektronike do të shënonte 90+6’. Një sukses “in extremis”, por sigurisht i merituar nga bardhezinjtë për atë që dhanë në fushë. Në lidhje me këtë përballje foli edhe trajneri Masimiliano Alegri, teksa në prononcimin e dhënë për “Sky Sport”, ai u shpreh:
“Futbolli është i pamëshirshëm, ke 95 minuta për të fituar ndeshjen, dy gola anulohen dhe më pas shënon pasi topi përplaset në shtyllë. Skuadra besoi deri në fund në këtë fitore dhe e bëri atë në mënyrë të rregullt. Ken nuk e meritoi zëvendësimin, por duke parë se iu anuluan dy gola, mendova se nuk ishte vërtet nata e tij dhe e largova: jam shumë i lumtur, ai është rritur shumë dhe mund të përmirësohet ende.
Duhet parë renditja. Duhet të shikojmë vendin e pestë. Duhet të jetë një kënaqësi për të gjithë djemtë, grupi është i jashtëzakonshëm dhe edhe sonte ata dhanë gjithçka në fushë.
Unë kam një dobësi për Jildiz, i cili ishte afër golit sapo hyri në fushë. Juventus ka një skuadër të përbërë nga lojtarë seriozë, të cilët i kuptojnë kufizimet e tyre dhe punojnë për to.
Në këto dhjetë vite klubi ka punuar shumë mirë dhe meritat nuk janë për mua, por për sektorin e të rinjve”, u shpreh Alegri.
PANORAMASPORT.AL
