Kupa e Botës në Katar (2022), së bashku me Kupën e Amerikës 2021 dhe 2024, ishin një çlirim për Lionel Messin, që më herët kishte fituar gjithçka me Barcelonën, por jo me përfaqësuesen.
“Falë Zotit, arrita të realizoja ëndrrën time më të madhe, që ishte të fitoja Kupën e Botës, për të cilën luftova aq shumë”, deklaroi tetë herë fituesi i Topit të Artë në një intervistë të fundit.
Sukseset me kombëtaren i hoqën Messit një barrë të papërshkrueshme nga vetja dhe tani, në moshën 37-vjeçare, nuk e ka më atë presion që kishte më parë.
Kuptohet që tani është në fundin e karrierës dhe me të drejtë lind pyetja: a do të jetë në Botërorin 2026?
“Shpresoj ta përfundoj mirë këtë vit dhe ta nis mirë vitin e ardhshëm, duke bërë përgatitje të mirë, gjë që nuk arrita ta bëja vitin e kaluar për shkak të shumë udhëtimeve që bëmë. Nuk ka mbetur shumë (deri në Kampionatin Botëror), por në të njëjtën kohë ka mbetur edhe shumë kohë në futboll, çdo gjë mund të ndodhë, ndaj mundohem të jetoj dita-ditës dhe të mos mendoj më tutje”, komenton “Pleshti”.
