Erzeni ka ndalur Tiranën në barazim 1 me 1. Sfida e vlefshme për javën e 23-të të Superiores, i dha bardhebluve dhe shijakasve nga 1 pikë. Të dy golat u shënuan në pjesën e dytë. Fillimisht Zeka me roveshatë dhe më pas Abazaj që barazoi gjithçka. Pas kësaj sfide ishte pikërisht ky i fundit që foli për mikrofonat e MCN TV.
“Më vjen keq dhe jam shumë i mërzitur. Si rrallë herë krijuam raste dhe lojë, por nuk arritëm të fitonim.
Nuk e kuptoj se po na ndodh që po luajmë mirë, por nuk po marrim 3 pikët. Normalisht që ne futemi në çdo ndeshje për fitore, për shkak të formulës.
Objektivi kryesor ka qenë të merrnim 3 pikët që të shkonim në derbi pak më të qetë. Derbi kundër Orges Shehit? Ne kemi punuar me profesor Shehin, është ndeshje e veçantë pasi kemi kaluar mjaft mirë. Por në fund të ditës ky është profesioni dhe pasioni jonë.
Shumicën e ndeshjeve nuk po luaj as në rolin tim në krah, por kaq lojtarë kemi ngel dhe do të përshtatemi kudo që të jetë. Gol Partizanit në derbi? Të jem i sinqertë nesër kam një vizitë me mjekët e ekipit, pasi kam shumë dhimbje”, është shprehur Kristal Abazaj.
