Pritja mori fund, Flamurtari provon shijen e fitores në këtë sezon të kampionatit Abissnet Superiore. Kuqezinjtë kanë mposhtur 1-0 kryesuesit e Vllaznisë në Vlorë, falë një goli të shënuar nga Herald Marku nga pika e bardhë e penalltisë. Ndalet pas 4 fitoresh radhazi skuadra shkodrane, që pavarësisht humbjes vazhdon të ruajë kreun e klasifikimit.
Ka qenë e bukur dhe e luftuar sfida e transmetuar drejtpërdrejt në RTSH Sport. Vendasit janë më kërkues, por pjesa e parë mbyllet në barazim pa gola. Flamurtari rrit presionin në pjesën e dytë, ndërsa Vllaznia mundohet të rrezikojë në kundërsulm.
Momenti kulmor i ndeshjes është në minutën e 73-të. Flamurtari shënon gol, por gjyqtari Florian Lata anulon golin dhe akordon 11-metërsh për vlonjatët për një prekje topi me dorë në zonë.
Nga pika e bardhë tregohet i saktë Herald Marku, që shënon golin që vulos fatin e sfidës dhe i jep Flamurtarit fitoren e parë sezone në kampionat. Kuqezinjtë ngjiten në kuotën e 5 pikëve, por mbeten të fundit në klasifikim, ndërsa Vllaznia edhe pas kësaj disfate ruan kreun, por tashmë ka vetëm 1 pikë më shumë se ndjekësit e Egnatias.
