Kryetari i Federatës së Futbollit të Kosovës ditën e sotme e ka nisur me një fotografi me disa prej futbollistëve të Kosovës.
Ai në postimin e bërë ka thënë se ky brez i ri i futbollistëve është gati për të shkëlqyer në skenën ndërkombëtare.
Në fotografinë e publikuar nga Ademi janë Ermal Krasniqi, Albion Rrahmani, Meriton Korenica, Visar Bekaj dhe Altin Zeqiri. Të gjithë emra të formuar në Kosovë.
“Dëshira e tyre e palëkundur për sukses dhe motivi i tyre plot pasion janë burimi i shpresave tona për një rezultat pozitiv sot në Bukuresht! Le t’i mbështesim me zemër dhe krenari, sepse ata janë e ardhmja e Kombëtares së Kosovës”, tha Ademi.
Gjatë ditës së djeshme Ademi pati polemika me kreun e Federatës Shqiptare të Futbollit, Armando Duka.
“Ne kemi pasur dhe kemi mirëkuptim me Federatën Shqiptare por mendoj se kjo nuk është në rregull të ftohen lojtarët që janë pjesë e Kombëtares sonë. Dellova ka qenë pjesë e Kosovës dhe është e papranueshme që ai të ftohet nga dikush tjetër”, ka thënë Ademi të hënën./Lajmi.net/
