Presidenti i FFK-së, Agim Ademi, po merr pjesë në garat e Kupës së Kosovës në Gjermani, të cilat po organizohen këtë fundjavë nga Federata e Futbollit Shqiptar në Gjermani, në bashkëpunim me FC Kosova München dhe nën patronatin e FFK-së.
Në këtë edicion të Kupës së Kosovës në Gjermani po marrin pjesë 10 klube shqiptare.
Këto klube janë seleksionuar si klubet më cilësore që luajnë në rangjet më të larta në ligat e tyre në qytete të ndryshme të Gjermanisë.
Në hapjen solemne të këtij aktiviteti kreu i FFK-së është nderuar nga përfaqësuesi i DFB-së për rajonin e Bayernit.
Ky aktivitet ka për qëllim të promovojë talentet e futbollit shqiptar në Gjermani dhe njëherësh të nxisë rritjen e nivelit garues të klubeve shqiptare atje.
Fituesi i këtij aktiviteti më pas do të luajë me fituesin e Kupës së Kosovës dhe me fituesin e Kupës së Unionit të Klubeve Shqiptare në Zvicër.
