Presidenti i Federatës së Futbollit të Kosovës, Agim Ademi, ka uruar kombëtaren e Kosovës në kategorinë e femrave pas fitores në Ligën e Kombeve.
Dardanet, të premten, në Shkup kanë shënuar fitore në përballje me Maqedoninë e Veriut, me rezultat 2:0, shkruan lajmi.net.
Ademi ka theksuar se kjo fitore duhet të jetë motiv për sukseset e ardhshme.
“Përgëzoj futbollistet e Kombëtares së Kosovës për fitoren e realizuar sot kundër Maqedonisë së Veriut në Shkup, me rezultat 2:0. Kjo është fitorja e parë e Dardaneve në garën e re të UEFA-s për futbollin e vajzave/grave – Ligën e Kombeve, e cila u jep shtysë për suksese të reja dhe për arritje të objektivit për promovim në Ligën B. Uroj të gjitha futbollistet për këtë fitore dhe stafin në krye me trajneren Anneli Andersen për punën e bërë, duke iu dëshiruar rritje të performancës në vazhdimësi dhe fitore edhe në ndeshjet e ardhshme”, ka shkruar ai në platformën Facebook.
Kjo ndeshje i takoi xhiros së dytë të Grupit 5 në Ligën C.
Ndeshjen e radhës Dardanet e zhvillojnë të martën (më 31 tetor) sërish kundër Maqedonisë së Veriut, në stadiumin “Fadil Vokrri” në orën 17:00. /Lajmi.net/