Vendimi i Lionel Mesit për të lënë Europën dhe transferuar në SHBA tek Inter Majemi vazhdon të ngjallë diskutime e debate.
Një nga të parët që ka komentuar vendimin e Leo Mesit ka qenë ai i mikut të ngushtë të tij, Serxho Aguero. Ish-sulmuesi i Barcelonës ka dhënë një intervistë për “Sportive World”, ku nënvizoi faktin se do të kishte dashur shumë ta shihte sërish Mesin me fanellën e Barcelonës.
“Unë mendoj se Mesi ishte i ngopur në Europë dhe në mjaft raste i pakënaqur me trajtimin e padrejtë që iu bë. Ndaj unë mendoj se ai e mori këtë vendim për të qenë më i qetë për veten dhe për familjen. Natyrisht që nuk mund ta mohoj se ishte një ndjesi e bukur e krijuar në javët e fundit në lidhje me mundësinë e kthimit të tij te Barcelona. Do të kisha dashur shumë ta shihja atë sërish me këtë fanellë. Por Leo e ka menduar ndryshe dhe të gjithë duhet ta respektojmë vendimin e marrë prej tij. Pastaj mos harroni se dhe Barcelona ka përgjegjësitë e saj…”, tha Aguero.
PANORAMASPORT.AL
