Në paraqitjen e tij të dytë në Lojërat Olimpike, xhudisti Akil Gjakova ka pranuar se synon të kthehet me medalje nga kjo ngjarje e madhe sportive që mbahet në Paris.
Në Olimpiadën e Parisit, Gjakova është njëri prej pesë xhudistëve të kualifikuar me normë olimpike dhe prej të cilëve pritet medalja në këtë ngjarje.
Ai do të paraqitet në kategorinë deri 73 kilogramë dhe do të garoj më datën 29 korrik. Për Akilin, kjo është hera e dytë që paraqitet në Lojërat Olimpike pas debutimit në Tokio katër vjet më parë.
Në Olimpiadën e Tokios, Gjakova doli i shtati në kategorinë e tij kurse në Paris synim mbetet podiumi.
“Këtë herë kam përmiësuar shumë gjëra dhe synimi kryesor është medalje. Jam i bindur se gjithçka do të shkoj shumë mirë”, ka thënë ndër të tjera Gjakova.
Akili së bashku me Nora Gjakovën, do të bartin flamurin e Kosovës në ceremoninë hapëse të Lojërave Olimpike që mbahet të premten mbrëma.
