Skuadra e Cristiano Ronaldos, Al Nassr, raportohet se është vënë pas një prej talenteve më premtues të Barcelonës.
Alexander Isak, Harvey Elliott dhe Jadon Sancho ishin disa nga emrat e mëdhenj që ndryshuan skuadër ditën e fundit të merkatos në Angli më 1 shtator – por duket se mund të ketë ende lëvizje të bujshme këtë verë.
Edhe pse merkatoja për klubet e Premier League është mbyllur, ekipet e Arabisë Saudite kanë ende kohë deri më 23 shtator për të bërë blerje të reja. Kjo do të thotë se klubet evropiane janë ende të rrezikuara për të humbur yjet dhe talentet e tyre më të mëdha.
Në vitet e fundit, shpenzimet marramendëse të Pro League saudite kanë tërhequr vëmendjen e botës së futbollit, me disa lojtarë që madje e kanë krahasuar nivelin e saj me Premier League.
Kjo nuk është aspak lajm i mirë për Barcelonën, e cila mund të humbasë një nga lojtarët e saj më të talentuar para mbylljes së merkatos.
Sipas mediave saudite, 18-vjeçari Marc Bernal, mesfushori defensiv i dalë nga akademia La Masia, është në shënjestrën e Al Nassr.
Bernal debutoi në La Liga në gusht 2024 dhe shihet si një nga talentet më premtues që ka nxjerrë Spanja vitet e fundit. Ai zhvilloi tre paraqitje mbresëlënëse në fillim të sezonit 2024/25, por më pas pësoi një dëmtim të rëndë në ligamentet e gjurit që e la jashtë gjithë sezonin.
Përveç Barcelonës, Bernal ka shkëlqyer edhe me kombëtaren U-17 të Spanjës, dhe pritet që në të ardhmen të bëhet pjesë e kombëtares së parë.
Al Nassr, që këtë verë ka marrë edhe Inigo Martinez nga Barcelona, po mendon një lëvizje të vonshme për Bernalin. Megjithatë, sipas raportimeve të Barcelona Universal, shanset për sukses janë të vogla.
Trajneri Hansi Flick e sheh Bernalin si pjesë kyçe të projektit të tij, sidomos pas dëmtimeve të Gavit dhe Frenkie de Jong, ndaj klubi katalanas nuk ka ndërmend të negociojë.
Cristiano Ronaldo, që kërkon të fitojë titullin e parë të Pro League me Al Nassr, është i etur për përforcime të reja. Ylli portugez, edhe pse në moshën 40-vjeçare, shënoi 25 gola sezonin e kaluar, duke u shpallur golashënuesi më i mirë i kampionatit.
Megjithatë, Al Nassr përfundoi vetëm në vendin e dytë, pas rivalëve të përjetshëm të Al Hilal./Express
