Amanda Dedej ka shkëlqyer në Ligën e të rinjve në Karate, teksa për moshën deri në 14 vjeç ka marrë medaljen e artë në peshën deri në 52 kilogram. Gjithçka është zhvilluar në Poreç të Kroacisë, ndërsa ishin rreth 4000 garues nga 78 vende të botës. Dedej ka zhvilluar gjashtë ndeshje e ka marrë 6 fitore.
Fillimisht 6-0 ndaj kundërshtares nga Ukraina. Më pas 4-0 ndaj konkurrueses nga Hungaria, 6-1 ndaj asaj të Suedisë, 1-0 ndaj sportistes nga Italia. Po 1-0 në raundin gjysmëfinal ndaj kundërshtares nga Bullgaria dhe në finale 4-0 ndaj konkurrentes serbe.
Në këtë aktivitet Shqipëria kishte në garë dhe Nevis Hasani në kategorinë e kadetëve pesha deri në 52 kilogram, Rigers Rami në kategorinë e juniorëve në peshën deri në 61 kilogram dhe Ernik Pjetri po në kategorinë e juniorëve pesha deri në 68 kilogram, që u rendit në vendin e shtatë.
Trajner të skuadrës ishin Lirim Dedej dhe Bekim Basha, kurse Amanda Dedej ishte maja e arritjes për karatenë shqiptare.
