Pas publikimit të listës nga Julian Nagelsman, janë zbardhur edhe analizat taktike sesi do të rreshtohet Gjermania në “Euro 2024”.
Prestigjozja “Kicker” është ndalur me imtësi në çdo repart, duke përzgjedhur “të preferuarit” e teknikut 36-vjeçar.
PORTA – Manuel Nojer është i paprekshëm. Ai do të mbajë detyrën e numrit “1”. Julian e ka cekur edhe më herët se i beson verbërisht kapitenit bavarez. Ndonëse Ter Shtegen gëzon statistika më të mira sezonale se Nojer, sërish do të duhet të kënaqet me statusin e zëvendësuesit.
MBROJTJA – Arsyeja se përse Hansi Flik u shkarkua nga posti te “pancerat” përkoi me problemet e mëdha në prapavijë. Por Nagelsman ka filluar të ndërtojë “murin” para Nojerit me protagonist binomin Rydiger-Tah. Nga krahët pozicionohet “zbulimi” Mitelshtad dhe Joshua Kimish. Freskia dhe shpejtësia e tyre do t’i jap frymëmarrje sulmeve të furishme prej linjave.
“NDËRTUESIT” – Toni Kros dhe Andrish do të luajnë funksionin e “urës lidhëse” mes mbrojtjes dhe fazës ofensive. Ata do të ndikojnë në ekuilibrat e skuadrës dhe krijimin e të çarave nga thellësia.
SULMI – Tredhëmbëshi Musiala-Gyndoan-Virc përveçse mbartin detyra goditëse, ata shfaqen në mbështetje të pykës “fallco” Kai Haverc, ky i fundit në udhëheqje të ekipit.
PANORAMASPORT.AL
