Carlo Ancelotti, trajneri i Real Madrid, foli në një konferencë për shtyp para ndeshjes kundër Valencias, të premten.
Kjo do të jetë sfida e parë e “los blancos” për vitin 2025.
“Ne fillojmë një vit të ri me shumë dëshirë. Është një ndeshje kërkuese ndaj një skuadre që ka ndërruar trajnerë dhe që na ka krijuar gjithmonë vështirësi. Duam ta fillojmë mbarë”, tha Ancelotti.
Më tej, trajneri italian shtoi: “Kjo ndeshje është një sfidë për të fgjithë ne. Skuadra është mirë dhe ka pushuar mirë këto ditë sepse të gjithë janë kthyer të motivuar dhe në formë të mirë”.
“Duhet të fitojmë ndeshje dhe, pas momentit negativ që përjetuam në nëntor, skuadra reagoi. Tani është më e mirë, e motivuar dhe kemi lojtarë të rikuperuar. Alaba tashmë po stërvitet me ne dhe atmosfera është e mirë. Ne mund ta ruajmë këtë vetëm duke fituar ndeshje”, tha Ancelotti.
Duke folur për merkaton e janarit, ai shtoi: “Do të shohim. Kemi shumë ndeshje në janar dhe jemi të fokusuar në këtë. Të flas për merkaton nuk është e lehtë për mua për momentin”.
Ancelotti flet edhe për rivalitetin mes Atletico Madrid e Barcelona në garën par titull. “është një garë e barabartë. Siç ndodhi me ne në nëntor, ndodhi me Barcelonën në dhjetor. Ju keni një rënie dhe pastaj ktheheni konkurrues si më pare. Barcelona dhe Atletico kanë të njëjtin shans për të konkurruar për La Liga si ne”.
