Sipas disa mediave braziliane, kohës së Neymarit me kombëtaren braziliane duket se po i vjen fundi.
Sulmuesi i Santosit, që ende po përpiqet të rikuperohet plotësisht nga dëmtimet e tij, raportohet se nuk bën pjesë në planet e Carlo Ancelottit për Kampionatin Botëror 2026.
Gazetari Rodrigo Mattos nga UOL ka zbuluar se trajneri italian e ka përjashtuar përfundimisht yllin brazilian, duke besuar se ai nuk është fizikisht gati për të konkurruar në nivelin më të lartë.
Në listën e fundit të skuadrës së Brazilit, Ancelotti ka zgjedhur një sistem taktik në të cilin Neymar nuk ka vend, gjë që tregon qartë një ndryshim drejtimi.
Gazetari tjetër i UOL, Pedro Lopes, mbështeti këtë version, duke shpjeguar se stafi i Ancelottit po e monitoron nga afër ecurinë fizike të Neymarit: “Ekipi i Ancelottit, që po ndjek nga afër Neymarin, beson se performanca e tij fizike është shumë më poshtë se ajo që kërkohet aktualisht për kombëtaren.
Ai do të duhet të përmirësohet ndjeshëm gjatë muajve të ardhshëm për të pasur ndonjë shans për të shkuar në Botëror.” Neymar nuk ftohet te Brazili që nga viti 2023.
