Trajneri i Real Madridit, Carlo Ancelotti ka folur në podkastin e ish-mesfushorit Obi Mikel, “The Obi One Podcast”, duke komentuar edhe për të ardhmen e tij.
A është Real Madrid klubi juaj i fundit si trajner?
“Ideja ime është që Real Madridi është klubi im i fundit, po. Për momentin nuk jam entuziast për idenë e trajnerit të një ekipi kombëtar, sepse do të humbisja atë që më pëlqen më shumë, që është jeta e përditshme me lojtarët dhe stafin”.
Si ishte Toni Kroos?
“Toni Kroos pati një rol të madh në këto dhjetë vjet, ku fitoi pesë Liga të Kampionëve. Casemiro, Kroos, Modric, Nacho dhe Carvajal ishin themelorë në këto dhjetë vite suksesi për Real Madridin. Dhe Kroos ishte thelbësor për cilësinë, profesionalizmin e tij dhe aftësinë për të lënë mënjanë egon. Dhe të rinjtë i shohin këto vlera çdo ditë për t’u përmirësuar si lojtarë”.
Kush do ta fitojë Topin e Artë?
“Unë mendoj se Vinicius do ta fitojë atë”.
Çfarë mendoni për Eden Hazard?
“Eden Hazard është një djalë fantastik. Problemi i tij ishin dëmtimet, padyshim, ai kishte këtë vështirësi. Duhet të stërvitesh me intensitet në stërvitje kur nuk luan. Ai kishte vështirësi të garonte, të luftonte dhe rrjedhimisht të luante”.
Cristiano Ronaldo dhe Bale?
“Ishte kaq e lehtë me CR7. Kur ke një lojtar që shënon në çdo ndeshje, është e lehtë. Cristiano është një profesionist i madh dhe një legjendë. Bale? Ai është një nga lojtarët më të mirë që kam trajnuar ndonjëherë. Ai konsiderohet një legjendë këtu”.
