Legjenda e futbollit të Kosovës dhe Kroacisë, Ardian Kozniku, ka luajtur për Kroacinë në vitet e 90-ta, ku ka fituar medaljen e bronztë në Kampionatin Botëror në vitin 1998.
Ai regjistroi shtatë paraqitje dhe dy gola. Në një intervistë për mediumin kroat “Sportklub”, ai ka reflektuar për momentet pozitive dhe negative në karrierën e tij të lojës, marrëdhëniet me trajnerin në atë kohë, kombëtaren më të mirë dhe më të ashpër,
Perishiqin dhe Modriçin, suksesin në Botëror për sa i përket medaljeve, kundërshtarët në Euro 2024 dhe 11 lojtarët më të mirë.
Cilin moment në karrierën tuaj të lojës do ta vlerësoni pozitivisht dhe cilin negativ?
Ardian Kozniku: Karriera është mjaft e gjatë. Ka pasur shumë ndeshje, duke përfshirë Kupat e Europës dhe Botërorit.
Përveç kësaj, ka shumë lojtarë dhe bashkëlojtarë. Sa i përket negatives, është kur humbet diçka. Ajo që mund të them është se kam pasur një dëmtim para Euro 1996. Theva këmbën dhe humba statusin e kombëtares. Isha jashtë formës. Pozitive është medalja e bronztë me Kroacinë në Kampionatin Botëror 1998 në Francë.
Edhe pse, para kësaj kisha fituar kampionatin dhe Kupën e Kosovës, Kupën e ish Jugosllavisë dhe Kroacisë me Hajdukun, Kupën e Austrisë me Karnten dhe Kupën e Francës. Përveç kësaj, janë dy tituj kampion kroat me Dinamon dhe Hajdukun dhe dy Superkupa të Kroacisë me Hajdukun. Megjithatë, bronzi është më i ëmbla për mua dhe është gjithashtu pika kryesore e karrierës sime.
Ju keni qenë në kombëtare nga viti 1994 deri në vitin 1998. Na tregoni për marrëdhënien tuaj me trajnerin e atëhershëm, Miroslav Çiro Blazheviq?
Ardian Kozniku: Para së gjithash, Bllazheviq prehu në paqe.
Sa ishte gjallë dhe tani nuk është me ne, është trajner i të gjithë trajnerëve. Gjatë gjithë karrierës sime kam pasur trajnerë shumë të mirë.
Kam pasur rastin të jem shumë herë nën drejtimin e tij. Ai drejtoi një kombëtare të madhe dhe një gjeneratë, e cila la gjurmë dhe hyri në historinë e futbollit kroat me Bobanin, Biliqin, Bokshiqin, Ladiqin, Jarni, Prosineçkin, Staniçin, Shtimacin, Shukerin etj. Ata lojtarë janë të paharrueshëm për mua. Deri në vitin 1998 kam kujtime shumë të mira me të.
Sipas jush, cilën kombëtare e konsideroni më të mirën dhe më të vështirën në Kampionatin Evropian dhe Botëror (në periudhën kur ishit në kombëtare)?
Ardian Kozniku: Italia, ku ne u kualifikuam në Euro 1996 përmes kualifikimeve dhe Gjermania që ishte mjaft e fortë dhe fitoi me sa mbaj mend. Këto ishin fuqitë e mëdha evropiane, por Gjermania ishte më e mira. Mund të ishim befasi, por humbëm nga gjermanët në çerekfinale. Megjithatë, në Kupën e Botës dy vjet më vonë, ne iu kundërpërgjigjëm atyre për atë humbje me një fitore 3:0.
Në Kupën e Botës e pritëm Francën, ku kam luajtur katër vite për ekipet franceze, fatkeqësisht humbëm ndaj tyre, por francezët dhe holandezët ishin të mirë. Ne mundëm 2:1 holandezët, të cilët ishin të zhgënjyer që luajtën me ne për vendin e tretë. Gjermania ishte më e mira në Euro dhe Franca e ne në Kupën e Botës.
Ne fituam medaljen e parë dhe ishte një befasi sepse askush nuk e priste dhe nuk e besonte. Shuker ishte golashënuesi më i mirë i Kupës së Botës. Çiro u shpall trajneri më i mirë dhe portieri Ladiç ishte ndër më të mirët sepse na shpëtoi me mbrojtjen e tij kundër Japonisë dhe Gjermanisë.
Rivalët tanë në Euro janë Shqipëria, Italia dhe Spanja. Si e parashikoni, cila do të shkojë?
Ardian Kozniku: Sikur të shikoja vetëm si tifoz, atëherë do të thosha se ne jemi të parët, dhe këta të tjerët janë të dytët, të tretët dhe të katërt. Ky grup përfshin tre superfuqi të futbollit, Kroacinë, Italinë dhe Spanjën.
Spanja ishte kampione dhe finaliste në Ligën e Kombeve dhe Italia u kualifikua pasi që nuk shkoi në Kupën e Botës. Shqipëria është e panjohur për të tjerët, por mund të shkaktojë probleme. Unë mbështes Kroacinë dhe dua që ajo të jetë e para sepse ka përvojë dhe cilësi nga garat e mëparshme. Do të doja që Shqipëria të jetë e dyta dhe le të jetë befasi.
Më thuaj 11-shen tuaj ideale të kombëtares kroate nga viti 1990 deri në këtë vit në formacionin 4-4-2?
Ardian Kozniku: Nuk mund të vendosja vetëm për 11-të, kështu që e shpërndava pak. Portierë Drazhen Ladiq dhe Stipe Pletikosa. Darijo Srna në krahun e djathtë, Robert Jarni në krahun e majtë, dhe mbrojtje janë Slaven Biliq, Igor Shtimac, Robert Kovaq dhe Josip Shimuniq. Mesfushorë janë Luka Modriç, Aljosha Asanoviq, Robert Prosineçki dhe Zvonimir Boban. Sulmues janë Alen Bokshiq, Davor Shuker, Ivan Perishiq dhe Mario Manxhukiq.
