Pavarësisht se Arsenali dështoi në të dytin vit radhazi për të fituar titullin kampion në Angli, drejtuesit e klubit janë të kënaqur me trajnerin Mikel Arteta.
Te Gunners e dinë se rrëzimi nga froni i Manchester Cityt është një mision i vështirë, por nuk janë dorëzuar.
Ekipi londinez do të tentojë përsëri fitimin e Premier League sezonin e ardhshëm. Trofeu i madh u mungon tifozëve të Arsenalit prej 2004.
Drejtuesit kanë përgatitur ofertën e rinovimit me teknikun spanjoll. Arteta vlerësohet shumë dhe dëshira është të vijohet së bashku.
E njëjta gjë vlen edhe për 42-vjeçarin, i cili ndihet për mrekulli në Londër dhe ka besim maksimal se do të arrijë të fitojë titullin e shumëpritur.
Ish-mesfushori iberik, i cili si futbollist kaloi 5 sezone tek Arsenali, qëndron në pankinën e skuadrës prej dhjetorit të vitit 2019.
Deri tani ka fituar një FA Cup dhe dy herë Superkupën e Anglisë. Kontrata e re do e kthejë në një nga trajnerët më të paguar në planet.
