Arsenali ka kaluar përpara Manchester United në garën për të nënshkruar mesfushorin e Wolves, Joao Gomes. 23-vjeçari ka befasuar në sezonin e tij të parë të plotë në Premier League nën drejtimin e Gary O’Neil.
Gomes ka bërë 42 paraqitje që kur iu bashkua klubit Wolverhampton në një transferim 15 milionë eurosh në janar të vitit të kaluar nga Flamengo. Këto paraqitje të mira kanë bërë që ai të grumbullohet edhe në ekipin kombëtar brazilian.
Sipas mediave britanike, Arsenal është favorit në garën për të nënshkruar me Gomes në merkaton e verës, pavarësisht interesimit nga United, që gjithashtu dëshiron lojtarin. “Topçinjtë” do të kërkojnë të hyjnë në negociata me Wolves këtë verë për mesfushorin.
Joao Gomes ka kontratë me Wolves deri në vitin 2028, ndërkohë që kostoja e kartonit të tij është rreth 30 milionë euro, pra dy herë më e lartë se ajo e para një viti. Lojtari ka realizuar edhe 3 gola në Premier League, dy këtë sezon.
