Mbrojtësi i krahut të majtë, Jordi Alba, do të largohet nga Barcelona, por jo edhe nga La Liga.
Ai do të luajë edhe edicionin e ardhshëm në kampionatin spanjoll, pasi pritet t’i bashkohet Atletico Madridit gjatë kësaj vere.
“Mundo Deportivo” shkruan të enjten se Atletico është afër arritjes së marrëveshjes me Barcelonën për lirimin e Albas, i cili tashmë ka kërkuar largimin e klubit.
Mësohet se për kartonin e tij, Atletico ka ofruar rreth 5 milionë euro duke pasur parasysh se ka kontratë me Barcelonën deri në vitin e ardhshëm.
Alba me Atleticon do të firmosë kontratë njëvjeçare dhe do ta ketë opsionin e vazhdimit edhe për një vit tjetër.
34-vjeçari këtë edicion ka 2 gola e 6 asistime në 28 paraqitje në të gjitha garat, ndërsa është pjesë e Barçës prej vitit 2012.
