Al-Hilal mposhti rivalin lokal Al-Itihad me rezultat 2-0 në Ligën e Kampionëve të Azisë të enjten, duke vendosur një rekord të jashtëzakonshëm.
Skuadra që drejtohet nga portugezi dhe ish-strategu i Benfikës, Horge Zhezus, ka arritur fitoren e 28-të radhazi.
Është seria më e gjatë e fitoreve e çdo skuadre në historinë e futbollit për meshkuj. Al-Hilal theu kështu rekordin e mbajtur më parë nga klubi uellsian The Nju Saints, i cili arriti në 27 fitore radhazi në vitin 2017.
Para kësaj, rekordin e mbante Ajax me një seri prej 26 fitoresh nga viti 1972.
“Të gjithë në klub janë të kënaqur që kemi shkruar historinë e futbollit botëror dhe kemi fituar 28 herë radhazi. Është vërtet një arritje e jashtëzakonshme dhe dua të falënderoj të gjithë ata që kontribuuan në këtë rekord”, ka thënë Jesus.
