Sulmuesi belg, De Ketelaere, ka zhvilluar një sezon të shkëlqyer me klubin e Atalantës, ku u finalizua në fund edhe me fitimin e Ligës së Europës nga ekipi bergamask.
Për këtë arsye drejtuesit e klubit të Atalantës duan ta blejnë përfundimisht kartonin e sulmuesit nga ekipi i Milanit, që e kanë në zotërim. De Katelaere erdhi si huazim nga “djajtë” në fillimin e këtij sezoni dhe ai i ka bindur bergamaskët që ta mbajnë atë, por nuk bien dakord me kushtet që ka vendosur Milani. Ata kanë nënshkruar një kontratë huazimi me të drejtë blerje prej 22 milion eurosh, por Atalanta kërkon që ta ulë pak këtë shifër.
Megjithatë Milani nuk e ka ndërmend, dhe nëse Atalanta nuk dëshiron t’i plotësojë kushtet e kontratës ata do të gjejnë një blerës tjetër. Nëse kjo gjë ndodh, gjithçka mund të varet nga performanca e belgut në Kampionatin Europian, ku ai është grumbulluar me kombëtaren e Belgjikës.
SONI SALIHI-PANORAMASPORT.AL
