Jannik Sinner e mbylli fazën e grupeve në ATP Finals me tri fitore në po aq ndeshje, pasi mundi amerikanin Ben Shelton me rezultatin 6-3, 7-6. Italiani e dominoi ndeshjen, sidomos në setin e parë, ku arriti një break të hershëm dhe nuk e vuri asnjëherë në dyshim kontrollin e lojës. Me një përqindje solide të shërbimit të parë dhe me agresivitet të vazhdueshëm nga fundi i fushës, Sinner e mbylli setin e parë pa asnjë rrezik real.
Seti i dytë ishte më i balancuar, me të dy lojtarët që shërbenin me saktësi të lartë dhe fitonin me lehtësi ‘game’-at e tyre në shërbim. Shelton tregoi forcë dhe guxim, sidomos kur shpëtoi një ‘match point’ në 5-4, duke e zgjatur ndeshjen deri në ‘tie-break’. Megjithatë, aty Sinner u tregua superior: fitoi menjëherë dy ‘minibreak’ dhe mbajti ritmin e lartë me goditje të fuqishme dhe zbarkime në rrjetë, duke e mbyllur 7-3.
Me këtë sukses, Sinner siguron kreun e grupit dhe kalon në gjysmëfinale, ku do të përballet me australianin Alex De Minaur. Fitorja ndaj Shelton konfirmon momentin e shkëlqyer të italianit, i cili nuk ka humbur asnjë set në fazën e grupeve dhe shihet si një nga favoritët kryesorë për titullin e ATP Finals.
