Javën e kaluar disa media ndërkombëtare njoftuan rikthimin e mundshëm të Neymar te Santos, duke shkaktuar një bujë të vërtetë. Megjithatë, menjëherë Pini Zahavi çaktivizoi bombën, por përtej mohimeve, e ardhmja e brazilianit vazhdon të jetë temë diskutimi.
Në orët e fundit është shtuar një kapitull i ri. Babai i lojtarit, Neymar Santos, ka nxjerrë praktikisht në treg djalin e tij, duke hapur derën e një lamtumire të mundshme me Al Hilal.
“Le të presim dhe të shohim se çfarë do të ndodhë dhe si do të ndihet vërtet Neymar. Ai do të jetë i lirë të vendosë. Ne kurrë nuk kemi qenë kaq të lirë të vendosim se ku të shkojmë. Të kesh një 32-vjeçar të lirë në duart e tua është një dhuratë për çdo njeri”, tha ai për podcastin Roundcast.
Duke kujtuar transferimet e mëparshme të djalit të tij, ai shpjegoi: “Ne kurrë nuk bëmë plane. Plani i vetëm që kishim ishte të shkonim në Barcelonë. Pjesa tjetër… PSG ishte e çmendur, u bë një vorbull dhe më pas papritur Al Hilal… Neymar ka kontratë deri në vitin 2025. Le të shohim se si do të rikuperohet, por zakonisht kthehet gjithmonë më mirë se sa ishte dhe këtë herë nuk do të jetë ndryshe”.
