Bajern Mynih vësh trohej para një viti si klubi i ëndrrave për çdo lojtar, marrë në konsideratë suksesin e bavarezëve në arenën vendëse e atë ndërkombëtare në spektrin e futbollit. Por tashmë gjithçka ka ndryshuar.
Çdo “aktor” që linte gjurmë në Bundesligë e shikonte me syrin e “ëndrrës në sirtar” Mynihun, ama korniza e dikurshme ka filluar të pësojë krisje të forta, e ku një pjesë e konsiderueshme e kësaj zymtësie vjen nga shkarkimet e befta të Julian Nagelsmanit në pikën më të nxehtë të sezonit e për t’i vënë “kapak” me “dëbimin” e Oliver Kahnit dhe Hasan Salihamixhiçit.
Triumfi në ligën vendëse nuk i ka rritur kredencialët as në lupën e lojtarëve me emër si Kejn, Osimhen, Deklan Rajs apo Kolo Muani. Pikërisht ky i fundit u “përzgjodh” nga presidenti i nderit Uli Hënes si personazhi i duhur për të rikthyer në udhën e duhur sulmin e gjermanëve.
REFUZIMET E NJËPASNJËSHMe-Herri Kejn u projektuar gjatë verës së shkuar si opsioni ideal në mbylljen e hendekut të lënë bosh prej largimit të Robert Levandovskit. Bomberi polak i siguronte klubit më të titulluar në Gjermani të paktën 40 gola në vit, kuotë e frikshme. Julian Nagelsman u detyrua të improvizonte “të harruarin” ÇupoMoting në rolin e “pykës”. Rrjetat e shtatlartit kamerunas nuk munguan, ndonëse prezenca dhe tërheqja e skuadrës ishte pa pikë referimi në majë të fazës ofensive. Goleadori i Totenhemit para disa ditësh ia bëri të qartë bordit nga Mynihu se nuk e ka në plan vazhdimin e karrierës me Bajernin.
Viktor Osimhen u “profetizua” nga Tuhel si “guri” i duhur që do t’i ngjiste kampionët aty ku e kishin vendin, në shkallën më të lartë të Europës rreth futbollit. Megjithatë edhe kjo piste u shua shpejt. Presidenti i Napolit, Aurelio de Laurentis, ia tregoi “tragën” e vlerës së nigerianit, plotë 150 milionë euro, kuotë që do të vinte me shpatulla pas murit sheikët e PSG-së dhe Mançester Sitit e jo më një ekip, i cili e ka mbajtur të lidhur “thesin” e shpenzimeve në historinë e vet si 33 herë triumfuesit e Bundesligës. Së fundmi, Randall Kolo Muani u “prenotua” nga Hënes në “Allianz Arena”.
Statistikat mbresëlënëse bëjnë që çdo trajner “të lëpijë gishtat”, kur përmendet lojtari me numrin 9-të te Frankfurti, e përkthyer me 23 gola dhe 17 asiste përgjatë 46 prezencave në të gjitha kompeticionet ku “shqiponjat” shkelën në sezonin 2022-2023. “Çdo futbollist e ka ëndërr të inkuadrohet në Premier Ligë, këtu nuk bëj përjashtim as unë”, ishin frazat e 24-vjeçarit transalpin në intervistën për kanalin francez “Canal+”.
Prononcimi i Randall nënkupton se Mynihu nuk preferohet. Dushan Vlahoviçi nuk i mungon listës së “pykave” në tempullin e rekordmenëve. Gjatë javës së shkuar u zbuluan biseda private Tuhel-Vlahoviç në Torino dhe u pasuan me fjalët se palët kishin gjetur mirëkuptimin rreth zhvendosjes. Ama skenarët kanë ndryshuar me futjen në lojë të Mançester Junajtidit dhe Çelsit. Gjigantët nga ishulli i janë “qepur” ballkanasit, i cili djersit fanellën e Juves. Rezymeja të orienton drejt një operacioni sërish pa sukses, përveç bindjes së Dushanit, pikësëpari duhet të gërmojnë thellë në xhepa, krahas shpenzimeve me “bollëk” nga “djajtë” e “blutë” e Londrës, sikurse e kanë dëshmuar në vitet e fundit.
REVOLTA NGA BRENDA-Nusair Mazraui, Matis Til dhe Zhoao Kanselo zbarkuan me pretendime në “stratosferë” te Bajerni. Mbrojtësi maroken e ka veshur fanellën e bavarezëve vetëm në 26 takime dhe në këtë hark nuk i ka kaluar mesatarisht 60 minutat aktive në fushë. Kaq ka mjaftuar që Mazraui të kërkojë dëshpërimisht largimin. “Kicker” pohon se fjala e fundit mbi këtë nismë të 23-vjeçarit do të pasohet nga ballafaqimi me teknikun Tuhel.
Til mund të konsiderohet më të drejtë si humbësi më i madh në Mynih. Hasan Salihamixhiç besoi fort në talentin e francezit, aq sa të bindte bordin për të shpenzuar 20 milionë euro ndaj një 17-vjeçari të papromovuar në kontinentin e vjetër. 6 konkretizimet në intervalin e 27 sfidave nuk e ndihmuan as Nagelsmanin e Tuhelin t’i besonin 90 minuta të plota. Ai ka filluar të kërkojë “shtëpi” të re, e ku Frankfurti është hedhur në sulm. Kanselo erdhi me formulën e huazimit nga Siti.
“Qytetarët” ia bënë të qartë gjermanëve se nëse dëshironin të firmosnin me luzitanin në përfundim të marrëveshjes, atëherë duhet të firmosin “çekun” prej 70 milionë eurosh. Kokëfortësia e Bajernit ndikoi te kampionët e Anglisë, duke e reduktuar shifrën në 40 milionë euro.
Reagimi surprizues ka ardhur nga vetë lojtari. Me pretekstin e klimës, se ai dëshiron të kalojë në Spanjë, Barça dhe Reali e presin krahëhapur. E gjithë ajo “perandori” e krijuar me aq mund nga legjenda të ndryshme në evoluimin e Bajernit ka marrë përmasat e “tragjedisë”, jo vetëm te të huajt, por as kontingjenti aktual nuk do të qëndrojë më në Mynih.
Përgatiti: SAIMIR MBËRSI – PANORAMASPORT.AL
