Nënkampioni i Kosovës në futboll, Ballkani ka avancuar në raundin e tretë kualifikues të Ligës së Konferencës.
Në raundin e dytë kualifikues të kësaj gare, Ballkani e eliminoi ekipin nga Malta, FC Floriana me rezultatin e përgjithshëm 5:3.
Edhe pse barazoi 1:1 në ndeshjen e kthimit të luajtur të enjten në Maltë, Ballkani e eliminoi FC Floriana, ekip që javën e shkuar e mposhti në Prishtinë me rezultatin 4:2.
Në ndeshjen e kthimit, Ballkani ishte në disavantazh prej fillimit të ndeshjes, por në minutat shtesë të pjesës së parë barazoi shifrat me anë të sulmuesit Sunday Adetunji.
Në raundin e tretë kualifikues të Ligës së Konferencës, Ballkani do të përballet me Shamrockun e Irlandës.
