Pas barazimit me Romën, Igor Tudor mendon se Juventusi i tij mund të bënte më mirë, edhe pse goli, sipas tij, erdhi për faj të mungesave në mbrojtje. “Duhet të pësojmë më pak nga goditjet standarde, edhe pse vjen si pasojë e mungesave të Bremerit, Gatit dhe Kabalit.
Na mungon struktura e tyre. Pash se kemi ende shumë gjëra për të përmirësuar. Pjesa e parë më pëlqeu shumë, treguam se kemi shpirt. Në pjesën e dytë ata ndryshuan disa gjera, por mendoj se ne ishim ata që kërkuam më shumë fitoren. Ne duam gjithmonë të fitojmë, por mund të them se rezultati ishte i drejtë”.
GOLI- “Ishte një gol shumë i bukur dhe me kualitet. Ne donim të sulmonim me sa më shumë lojtarë, por nga ana tjetër edhe të mos pësonim kundërsulme. Hymë mirë në lojë dhe luajtëm mirë. Më pëlqeu shumë qasja ndaj ndeshjes, pavarësisht rezultatit”.
AMBIENTI- “Jam këtu prej disa ditësh dhe adrenalina e emocioni më është rritur jashtëzakonisht shumë. Megjithatë, është diçka e bukur dhe unë e kam mendjen vetëm te puna. Ndonjëherë fokusohem aq shumë te detajet dhe te gjërat që duhet të përmirësojmë, saqë harroj ta shijoj punën që jam duke bërë. Nga jashtë duket sikur mund ta shijosh shumë, por në të vërtetë nuk është kështu”, tha ndër të tjera trajneri i Juventusit, Igor Tudor, pas barazimit me Romën.
PANORAMASPORT.AL
