Trajneri i Liverpulit, Jyrgen Klop, tha se nuk i kujtohet një ndeshje që skuadra e tij ta ketë dominuar më shumë, sesa kjo kundër Mançester Junajtidit dhe meritonte që ta fitonte. Trajneri gjerman u shpreh se edhe në mars, kur i mundën 7-0 nuk i kishin dominuar në këtë mënyrë.
“Pash shumë gjëra të mira, e vetmja gjë që nuk më pëlqen është rezultati. Ne duhet të kishim shënuar. Ishim të nxituar në momente të caktuara, por më pëlqeu shumë intensiteti i lojës dhe nisja e ndeshjes. Të gjithë e panë atë që donim, kundërpresingu ynë ishte i mirë si grup dhe nuk i lamë të dilnin. Nuk mbaj mend një paraqitje kaq dominuese kundër Junajtidit, madje edhe në 7-0. Tani përfundoi 0-0 ata ndoshta ndjehen pak më mirë se ne. Ne e marrim pikën dhe vazhdojmë. Ishte lloji i ndeshjes që prisja. Nëse luajmë kështu, është e vështirë për skuadrën kundërshtare të dalë nga gjysmëfusha e tyre”.
Pastaj edhe një batutë me mediat për rolin e superfavorites që i kishin vendosur skuadrës së tij, gjë që nuk bëri veçse ndihmoi rivalët e Junajtidit:
“Unë mendoj se ju e mbivlerësoni ndikimin tuaj. Ne nuk shqetësoheshim për atë që ju thoni. E dinim se do të ishte e vështirë. Ajo që të gjithë thonë vetëm e ndihmon Junajtidin. Ata u karikuan dhe nuk mund të kujtoj një ndeshje ku ata tundin një flamur të bardhë, kjo nuk ka mundësi. Këtë herë ishte faji ynë”.
Përgatiti: ANDROKLI DRALO – PANORAMASPORT.AL
