Barcelona ka shfaqur futboll të jashtëzakonshëm ndaj Newcastle Unitedit të mërkurën mbrëma dhe ka avancuar në çerekfinale të Ligës së Kampionëve.
Barcelona në “Camp Nou” fitoi me rezultatin 7:2 dhe ka avancuar tutje me rezultatin e përgjithshëm 8:3.
Ndeshja e parë në udhëtim javën e kaluar u mbyll 1:1.
Pjesa e parë ishte më e niveluar dhe përfundoi 3:2 në të mirë të Barcelonës.
Raphinha shënoi për 1:0 me asistim të Fermin Lopezit, ndërsa Anthony Elanga i barazoi shifrat në minutën e 15-të.
Tre minuta më pas, talenti 18-vjeçar Marc Bernal, realizoi për 2:1. Por Newcastle nuk u dorëzua dhe i barazoi shifrat sërish me Elangan, në minutën e 28-të.
Pak para përfundimit të pjesës së parë, Barcelona fitoi penallti pas rishikimit të situatës në VAR. Ekzekutimin e penalltisë e mori përsipër superylli, Lamine Yamal, që shënoi për 3:2 në minutën e shtatë shtesë të pjesës së parë.
Pjesa e dytë i takoi në tërësi skuadrës “blaugrana”.
Fermin Lopez e shënoi golin e dytë personal në ndeshje në minutën e 51-të, me asistim të Raphinhas. Raphinha në minutën e 56-të asistoi edhe në golin për 5:2 për Robert Lewandowskin, i cili shënoi tjetër gol në minutën e 61-të, me asistim të Lamine Yamalit.
Rezultatin përfundimtar e vendosi braziliani Raphinha, në minutën e 72-të.
Barcelona për shkak të lëndimit në këtë ndeshje e humbi portierin e parë, Joan Garcia. Ai u zëvendësua nga Wojciech Szczesny.
Barcelona në çerekfinale do të përballet me fituesin e ndeshjes Tottenham – Atletico Madrid, që nis në orën 21:00. Ndeshjen e parë në “Wanda Metropolitano”, Atletico e fitoi 5:2.
Çerekfinalet e Ligës së Kampionëve zhvillohen më 7 dhe 8 prill, kurse ato kthyese më 14 dhe 15 prill.
