Barcelona ka marrë një goditje të rëndë para ndeshjes së shumëpritur ndaj Real Madridit.
Dani Olmo ka pësuar një dëmtim gjatë humbjes 4-2 kundër Paris Saint-Germainit në Ligën e Kampionëve dhe rrezikon të qëndrojë jashtë fushave për katër deri në pesë javë.
Mesfushori ofensiv u detyrua ta ndërpriste ndeshjen në Paris në pjesën e parë, duke u zëvendësuar nga Fermín López. Lëndimi i tij ka shkaktuar shqetësim te stafi teknik i Hansi Flickut, veçanërisht për shkak të rëndësisë së sfidës së ardhshme ndaj Real Madridit.
Tërheqje muskulore
Sipas raportimeve të para të mediave spanjolle, Olmo dyshohet se ka pësuar një çarje në muskulin aduktor të këmbës së majtë.
Megjithatë, shkalla e saktë e dëmtimit dhe koha e rikuperimit pritet të përcaktohen pas ekzaminimeve të mëtejshme mjekësore, përfshirë rezonancën magnetike.
Nëse konfirmohet dëmtimi i dyshuar, futbollisti spanjoll mund të mungojë rreth një muaj, madje deri në pesë javë. Kjo do ta përjashtonte nga “El Clásico” i së dielës kundër Real Madridit, si dhe nga disa ndeshje të tjera të rëndësishme.
Flicku me probleme të shumta
Mungesa e mundshme e Olmos do të ishte një tjetër shqetësim për Hansi Flickun, i cili tashmë ka probleme me lëndimet në skuadër. Në infermieri ndodhen edhe Eric Garcia, Andreas Christensen dhe Jules Koundé.
Barcelona kishte nisur sezonin 2026/27 me 11 fitore radhazi në të gjitha garat, duke shënuar 50 gola, por humbja ndaj PSG-së i dha fund këtij ecurie pozitive.
Tani, katalunasit duhet të presin rezultatet përfundimtare të ekzaminimeve të Olmos, ndërsa stafi teknik do të detyrohet të shqyrtojë alternativat për mesfushën para duelit vendimtar me Real Madridin.
Përveç “El Clásico”-s, nëse mungesa e tij zgjatet deri në pesë javë, Olmo mund të humbasë edhe ndeshjet e ardhshme kundër Alavésit, Aston Villës, Atlético Madridit, Villarrealit dhe Sabahut.
