Një nga shenjat e identitetit të Barcelonës së re është përkushtimi total i klubit ndaj lojtarëve të rinj. Ishte një nga premtimet që Joan Laporta bëri gjatë fushatës së tij zgjedhore pasi “La Masía” mezi kontribuoi me lojtarë në ekipin e parë të Barçës për shumë vite.
Vetëm Serxhi Roberto u konsolidua në një periudhë prej më shumë se pesë sezonesh. Të gjithë trajnerët që Laporta ka pasur në këtë fazë të dytë të tij si president e kanë konfirmuar atë bast. Ronald Kuman solli disa të rinj, më pas vijoi Ksavi Hernandez, i cili u hodh në “La Masia” dhe tani Hansi Flik, i cili pavarësisht se është një trajner që nuk ka dalë nga Barcelona, ka vënë një bast të fortë për të rinjtë e klubit.
Qëndrimi i tij ndaj produktit të akademisë së klubit ka qenë befasues. Laporta njeh meritat e Flik “Ai e ka kuptuar se “La Masia” (Akademia) është thesari ynë dhe se është plot me lojtarë të mirë dhe ka qenë i guximshëm për t’i angazhuar ata në ekipin e parë. Kjo është diçka shumë e mirë për klubin. Jam i lumtur që ai ka vendosur të vërë bast te ata. Ai është një trajner që nuk kërkon justifikime. Ai e ka kuptuar se talenti i akademisë tonë është i madh”, tha Laporta të martën e kaluar në një konferencë për shtyp.
E PARA NË LISTË – Rezultati i këtij veprimi të kombinuar të tre trajnerëve të fundit të Barcelonës është përtëritja progresive e skuadrës së Barçës, e cila është bërë më e reja në elitën e futbollit spanjolle. Mosha mesatare e skuadrës aktuale është 24.1 vjeç. Ulja e moshës mesatare në krahasim me vitet e kaluara është e konsiderueshme. Në sezonin 2023-2024 mosha mesatare ishte 25.8 vjeç. Largimi i shumë lojtarëve veteranë ka qenë kyç. Këtë verë janë larguar Serxhi Roberto, Gyndoan, Markos Alonso dhe Oriol Romeu, të gjithë mbi 30 vjeç, përveç Zhoao Feliks dhe Kanselo që ishin të huazuar.
ARDHJA E TË RINJVE – Largimi i disa veteranëve është shoqëruar me ardhjen e shumë futbollistëve të rinj. Disa ishin në skuadër, por tani ata janë edhe më shumë se pjesë e ekipit të pare: Kubarsi, Lamin Jamal, Fermin Lopez, Mark Kasado, Mark Bernal si dhe nënshkrimet Dani Olmo dhe Pau Viktor. E gjithë kjo ka bërë që Barcelona të ketë aktualisht një nga skuadrat më të reja në historinë e saj, e cila parashikon një të ardhme premtuese. Në krahasim me klubet e tjera në Liga, Barcelona ka një moshë mesatare prej 2.4 vjet më të ulët se Reali i Madridit, ose katër vjet në krahasim me Atletikon e Madridit, e cila është një nga skuadrat me më shumë veteranë në përbërje.
JAMAL DHE KUBARSI – Përveç kësaj, skuadra e Barçës ka tre nga pesë lojtarët më të rinj në La Liga: Jamal, Kubarsi dhe Vitor Roke, me këtë të fundit që është huazuar në këtë sezon te Betis. Në total, Flik ka në dispozicion dhjetë lojtarë nën moshën 23 vjeç në ekipin e parë.
Përgatiti: LEDJO SEFERKOLLI – PANORAMASPORT.AL
