Bashkëpunimi i Shqipërisë dhe Serbisë për organizimin e Europianit të të rinjve ka bërë bujë të madhe në Europë. Kjo e diktuar edhe nga historia që kanë dy shtetet, por edhe për çështjen e Kosovës.
Presidenti i UEFA-s, Aleksander Ceferin ka treguar këndvështrimin e tij për këtë çështje, në një intervistë për “Delo”. Numri një i futbollit europian thotë se të dyja federatat, ajo shqiptare dhe ajo serbe, të mbështetura nga qeveritë përkatëse, kanë shprehur dëshirën për ta organizuar së bashku këtë turne:
“Unë kam një dashuri të veçantë për të gjitha kombet e ish-Jugosllavisë. Por më vjen keq që në dekadat e fundit kanë qenë shumë të trishtueshme. Por i gjithë Ballkani Perëndimor është një bombë me sahat. Problemi kryesor është se liderët e tyre po bisedojnë me burokratët europianë që nuk e kuptojnë mendësinë e Ballkanit, ish-Jugosllavisë, Shqipërisë dhe vendeve të tjera. Interesant është fakti se Federata Shqiptare e Futbollit dhe ajo e Serbisë, të mbështetura nga të dyja qeveritë, kanë shprehur dëshirën për të organizuar Europianin U-21 të vitit 2027 së bashku, një dëshmi e mëtejshme se sporti është mbi politikën, se sportet janë diçka e mirë. Kjo është një mundësi e shkëlqyer për të treguar se futbolli është mbi politikën e përditshme”, tha ndër të tjera Aleksandër Ceferin.
PANORAMASPORT.AL
