Skuadra e Bashkimit sonte zhvillon ndeshjen e fundit në grupet e FIBA Europe Cup.
Pas dy fitoreve të mëdha që ka arritur, klubi nga Prizreni tani e ka mendjen te fitorja e tretë, e cila, me pak fat, mund ta kualifikojë në fazën tjetër të kësaj gare.
Sonte Bashkimi përballet me lideren e grupit, Dijonin e Francës, takim që fillon nga ora 20:00 dhe pritet të jetë shumë i rëndësishëm për të dy palët.
Edhe pse Bashkimi ndodhet i fundit në tabelë, grupi është shumë i barabartë, ku katër skuadrat kanë mundësi kualifikimi.
Bashkimi dhe Reggiana aktualisht mbajnë dy pozitat e ulëta me nga 7 pikë, ndërsa Cibona dhe Dijoni janë më lart me nga 8 pikë të mbledhura.
Prizrenasit janë në super seri, pasi në dy ndeshjet e fundit në FIBA Europe Cup arritën dy fitore, ndërsa në Superligën e Kosovës në basketboll ende nuk kanë pësuar humbje.
Skuadra nga Prizreni ka udhëtuar e kompletuar drejt Francës, ku trajneri Igor Jovović do t’i ketë të gjithë lojtarët në dispozicion.
Përveç Bashkimit, në grupet e FIBA Europe Cup merr pjesë edhe skuadra e Trepçës, e cila matematikisht nuk mund të kalojë në fazën tjetër dhe nesër luan kundër Anwil-it të Polonisë.
