Skuadra e Bashkimit i është afruar kualifikimit në finalen e “play-offit” të Superligës së Kosovës në basketboll.
Bashkimi po avancon 2:1 në serinë gjysmëfinale ndaj Borës, dhe i duhet edhe një fitore për të prekur finalen.
Në ndeshjen e tretë gjysmëfinale, të luajtur të mërkurën mbrëma në Prizren, Bashkimi triumfoi 88:83 për ta rimarrë avantazhin në këtë seri kundër Borës.
Edhe pse e humbi çerekun e parë, Bashkimi i fitoi tri periudhat tjera për ta mbyllur takimin me fitore.
Shanon Shorter me 23 pikë e 6 kërcime ishte më efikasi te Bashkimi, ndërsa te Bora u veçua Jordan Dingle me 23 pikë, 6 kërcime e 2 asistime.
Ndeshja e katërt e kësaj serie, zhvillohet këtë vikend në Prishtinë.
Teilen:
