Derrick Rose njoftoi fundin e karrierës së tij këtë të enjte në rrjetet sociale. Lojtari 35-vjeçar zbuloi atë që shumë prisnin tashmë pas përfundimit të kontratës me Memphis Grizzlies. Ai luajti 16 vjet në NBA në Çikago, Nju Jork, Cleveland, Minneapolis dhe Detroit, përpara se të mbërrinte në Memphis.
“Duke ditur se i dhashë gjithçka lojës, ndihem i sigurt në vendimin tim”, shpjegoi Derrick Rose. “Basketbolli ishte vetëm fillimi për mua. Tani është e rëndësishme t’i jap gjithçka familjes sime, ata e meritojnë.
Besoj se suksesi i vërtetë vjen kur bëhesh ai që duhej të ishe dhe unë dua t’i tregoj botës se kush jam, përtej basketbollit. Për mirë apo për keq, të gjithë kanë një histori. Edhe sikur të mundja, nuk do të ndryshoja asgjë në lidhje me karrierën timen, sepse kjo është ajo që më ndihmoi të gjeja gëzimin e vërtetë”, tha Rose për “The Athletic”.
I zgjedhur në draftin e vitit 2008 nga Chicago Bulls, Rose pati një ndikim të menjëhershëm në Ligë, duke fituar çmimin startuesi i vitit dhe, në vitin 2011, duke u bërë MVP në moshën 22 vjeçare (mesatarisht 25 pikë dhe 7.7 asistime për ndeshje me Bulls), në vitin e tretë. Ai është ende MVP më i ri në historinë e kompeticionit.
