Eliminimi nga Kupa e Gjermanisë dy ditë më parë, pas humbjes 0-1 ndaj Bayer Leverkusen, nuk ka dekurajuar trajnerin e Bayern Munich, Vincent Kompany. Ai është i bindur se skuadra bavareze do të arrijë të rikthehet te fitorja e fitojë trofe.
“Tani jemi eliminuar nga Kupa dhe nuk mund ta ndryshojmë më këtë fakt. Por, ne të gjithë besojmë te forcat tonë dhe se mund të fitojmë shumë ndeshje. Ne nuk do ta fitojmë Kupën këtë sezon, por kemi turne të tjerë përpara”, tha Kompany.
“Ne mund ta fitojmë titullin këtë vit. Nëse vazhdojmë të luajmë kështu, do të fitojmë shumë tituj në të ardhmen. Ne duhet ta lëmë këtë humbje pas vetes dhe të fillojmë të luftojmë sërish nga nesër për të fituar ndeshjet e ardhshme”, tha më tej Kompany.
“Unë e ndjej këtë gjë. Ne jemi të uritur. E dimë se në të kaluarën nuk kemi qenë të përkryer.
Kjo është arsyeja pse çdo ditë, çdo ndeshje dhe çdo moment që kalojmë është një luftë për të treguar sërish se sa të mirë jemi”, shtoi trajneri i Bayern Munich.
