Klubi i Al Itihad ka gjetur më në fund një emër të ri për pankinën. Pas largimit të Nunjo Espirito Santo pak ditë më parë, pas përplasjeve të tij me Karim Benzema, klubi arab ka afruar një legjendë të vërtetë të pankinave dhe do ta bëjë një nga emrat më të paguar në botë.
Julen Lopetegui dukej shumë pranë firmës, por në fund vendosi që të refuzonte ofertën që i kishte bërë klubi arab. Ndaj ky i fundit ktheu sytë nga një nga emrat më të njohur të Amerikës së Jugut, argjentinasi Marselo Gajardo.
Trajneri i cili drejtoi nga vitit 2014, deri në vitin 2022 klubin e River Plejt, është një emër shumë i vlerësuar dhe të cilin mendohet se edhe Benzema e kishte mbështetur si kandidaturë. Tekniku i cili ka nofkën “El Muneco” (kukulla) që nga vitit kur ishte futbollist, njihet për stilin e tij të lojës ofensive dhe te Al Itihad janë të bindur se do të jetë një sukses si në Argjentinë ku fitoi 2 herë Kupën Libertadores.
Palët kanë nënshkruar një kontratë deri në dhjetorin e vitit 2025 me të drejtën për të zgjatur marrëveshjen edhe 18 muaj të tjerë në varësi të disa kushteve që mund të plotësohen gjatë kësaj periudhe.
PANORAMASPORT.AL
