Në janar, Besa bëri disa afrime cilësore ku mes tyre lojtarë që tani janë shndërruar në kolona të ekipit.
Shumica e atyre kanë kontrata afatgjata, që i mbajnë të lidhur së paku dhe 2 vite te Besa.
Ndërkohë që presidenti Nexhat Bizhdili me sa duket nuk ka dashur t’ia lërë rastësisë fatet e disa futbollistëve, ndaj ka “nxituar” të mbyllë llogaritë me ta.
Kështu, bashkëpunimin e ka zgjatur edhe për sezonin tjetër qendërmbrojtësi Abdulai Nurudeen, paraqitja e të cilit është pëlqyer te verdhezinjtë.
Një tjetër futbollist që vërtet ka befasuar, por edhe kënaqur me lojën e tij, ka qenë mesfushori Alfouseni Dabo. Kështu që klubi ka rinovuar kontratën edhe me mesfushorin. Të dy këta futbollistë do të kontribuojnë edhe për sezonin e ri në radhët e Besës. Ndërkohë që portieri Dorant Ahmetaj, mesfushori Endrit Emini, Ermir Spahiu, Joni Nurja, Ersi Kapo, Donat Mehmeti, Denis Balla, Olt Zeqiraj, Skerdi Puqja mbeten nën kontratë edhe për sezonin e ri. Nuk dihet fati i shijakasit Myslym Ramilli, që byllur kontratën në fund të muajt maj, po ashtu edhe tre të huajt e tjerë, Nkube, Kamohelo dhe ai që zhgënjeu në fakt më shumë, sulmuesi Mustafa Ba. Për këta 3 të fundit nuk dihet nëse do të mbeten pjesë e Besës edhe pse të tre janë nën kontratë me verdhezinjtë.
Në këto kushte, thuajse 70% e grupit që mbylli sezonin, me siguri do të vijojnë të mbeten pjesë e verdhezinjve edhe për një sezonin tjetër. Më tej, duhet pritur se çfarë afrimesh do të bëjë presidenti Bizhdili në merkaton e ardhshme dhe cili do të jetë fati edhe i trajnerit Dorjan Bubeqi.
Tifozët kavajas janë shprehur haptas se duhet të jetë pikërisht ky i fundit, pasi ai gëzon besimin e tyre të plotë dhe se do të ishte ky investimi i parë dhe i domosdoshëm për sezonin e ri. Bubeqi pranoi të marrë drejtimin e skuadrës në momentin më të vështirë dhe në fund u arrit qëndrimi në të Parën.
