Renditja e FIFA-s: Bie Kosova, ngritet Shqipëria.
FIFA e ka publikuar sot renditjen më të re botërore të Kombëtareve.
Në ranglistën e muajit qershor, Kombëtarja e Kosovës e sheh veten në vendin e 108-të, ndërsa ka rënie për një pozitë ngase në atë të fundit ishte e 107-ta, shkruan Gazeta Express.
“Dardanët” patën rezultate zhgënjyese në këtë muaj duke barazuar në shtëpi me Rumaninë dhe duke u mposhtur nga Bjellorusia në terren neutral.
Kosova i ka 1179,69 pikë, ndërsa e sheh veten prapa Madagascarit dhe përpara Taxhikistanit.
Ndërkaq, Kombëtarja shqiptare kishte ngritje në renditjen e FIFA-s.
Kuqezinjtë kanë përparuar për tri pozita, nga ajo e 68-të në të 65-ën.
Ekipi i Sylvinhos i ka 1357,39 pikë, ndërsa gjendet përpara Kepit të Gjelbër dhe prapa Irlandës së Veriut.
Shqipëria i regjistroi dy fitore në muajin qershor, kundër Moldavisë dhe ndaj Ishujve Faro, po ashtu në kualifikimet e Euro 2024, shkruan Gazeta Express.
Sa i përket renditjes së përgjithshme, vazhdon të prijë kampionia e botës, Argjentina, e ndjekur nga nënkampionia botërore, Franca, ndërsa Brazili është i treti.
