Trajneri i Tiranës, Roberto Bordin, nuk e fshehu zhgënjimin pas humbjes 3-1 në Shkodër, por theksoi se skuadra e tij ka ende potencial për t’u rritur. Në intervistën pas ndeshjes, tekniku italian analizoi me kujdes lojën e bardhebluve dhe pranoi se gabimet mbrojtëse kushtuan shtrenjtë.
“Bëmë mirë fillimin dhe fundin e pjesës së parë, por në mes të saj humbëm ekuilibrin. Pësuam dy gola, ku i dyti ishte i shmangshëm. Në pjesën e dytë, me një lojtar më shumë, hapësirat u ngushtuan, por kishim 2-3 raste për ta rihapur ndeshjen. Është mëkat që nuk i shfrytëzuam,” – tha Bordin.
Ai shtoi se ekipi duhet të reagojë më fort në fazën ofensive: “Kemi bërë shumë pak për të ndërtuar aksione. Duhej më shumë guxim, më shumë krosime për të krijuar vështirësi te kundërshtari që u mbyll shumë mirë dhe u nis me shpejtësi në kundërsulm.”
Tekniku vlerësoi përkushtimin e lojtarëve, por theksoi nevojën për vazhdimësi: “Valerianos dhe të gjithë të tjerët dhanë maksimumin, por lodhja në fund ndikoi. Penalltia për Vllazninë? Balaj është me eksperiencë dhe e fitoi me zgjuarsi. Nëse do të shënonim për 3-2, mund të ishte ndryshe.”
Në fund, Bordin u bëri thirrje lojtarëve për reagim: “Duhet të interpretojmë më mirë ndeshjet pas një fillimi të mirë sezoni. Nuk mund të kemi rënie të tilla. Dua më shumë për lojën, por mbi të gjitha dua pikë, për skuadrën, klubin dhe tifozët tanë.”
