Sven-Goran Erikson është ndarë nga jeta në moshën 76-vjeçare. Ish-trajneri i Anglisë dhe shumë skuadrave në Serinë A, ishte i sëmurë prej disa kohësh pasi vuante nga kanceri në pankreas.
Suedezi u bë trajneri i parë i huaj i ekipit të futbollit të meshkujve të Anglisë në vitin 2001, duke drejtuar të ashtuquajturin “brezi i artë” i lojtarëve duke përfshirë David Bekam, Steven Gerard, Uejn Runi dhe Frank Lampard.
Gjatë karrierës së tij, ai drejtoi një sërë klubesh evropiane të profilit të lartë si Benfika, Roma, Fiorentina, Sampdoria dhe Lacio.
Erikson u largua nga roli i Anglisë pas Kupës së Botës 2006 dhe më vonë do të menaxhonte Meksikën dhe Bregun e Fildishtë, si dhe klubet angleze Mançester Sitit apo Leistër Sitit.
Për shkak të problemeve të tij shëndetësore, ai dha dorëheqjen si drejtor sportiv në klubin suedez Karlstad në shkurt 2023.
Pasi shpalli diagnozën e tij me kancer, Erikson iu plotësua dëshira e tij e përjetshme kur ai drejtoi Liverpul Legends, pasi ata luajtën në një ndeshje bamirësie kundër Ajaksit në Anfield në mars.
PANORAMASPORT.AL
