Marcelo zbuloi se ai mori disa oferta kur ishte i lirë në merkato, njëra prej të cilave ishte nga Al Nassr, ku mund t’i bashkohej Cristiano Ronaldos, me të cilin tashmë kishte ndarë dhomën e zhveshjes te Real Madridi.
Megjithatë, mbrojtësi i majtë, i cili rrëfen se kishte menduar t’i jepte fund karrierës, përfundoi duke u rikthyer te Fluminense.
“Ne (Marcelo dhe Cristiano Ronaldo) folëm për këtë disa kohë më parë. Kisha disa propozime, jo vetëm nga atje (Al Nassr), por më duhej të kthehesha këtu (Brazil), te rrënjët e mia. Diçka më tha se duhej të kthehesha”,- tha ai, duke folur për podcastin “Charla”.
“Dhe më pas, kur flisja me gruan, me djalin tim, ishte shumë e vështirë të lija Enzon atje në Madrid, pasi ai luan për Real Madridin. Ishte e vështirë.
Nuk ishte vetëm, se kishte njerëz me të, sigurisht, me të ishte edhe menaxheri im, i cili është kunati, shoku im i fëmijërisë, Aleksi që punon me mua. Me të ka njerëz, jo prindërit e tij.
Gruaja ime përpiqet të shkojë në Spanjë për të qëndruar me të për një javë, ajo duhet të xhirojë filma dhe pastaj ajo qëndron vetëm për dy ditë. Nëse nuk do të më ndihmonte gruaja ime, nuk mendoj se do të vija në Brazil”,– shtoi ai.
Duhet theksuar se 35-vjeçari brazilian fitoi së fundmi Libertadores me Fluminense.
