Klubi i Çelsit do të nisë me shumë mundësi kampionatin pa një sponsor zyrtar në fanellën e ndeshjeve. Londinezët kanë mbyllur kontratat e sponsorizimit të vitit të kaluar dhe tashmë janë në diskutime me kompani të tjera.
Një prej tyre u refuzua nga Premier Liga, pasi “Paramount+” është një rival direkt i kompanive që kanë të drejtën TV të kampionatit. Një tjetër ishte një kompani bastesh, që u refuzua nga tifozët. Ndaj tani klubi ka mbetur pa sponsor kur mbeten pak ditë nga starti i kampionatit, që nis me një ndeshje shumë të rëndësishme ndaj Liverpulit.
Në fakt, Çelsi raportohet se ka marrë një tjetër shumë të rëndësishme financiarisht, nga një faqe me përmbajte pornografike. Platforma me pagesë “MyClub”, i kishte ofruar bluve 40 milionë paund për të vendosur logon e saj në pjesën e përparme gjatë këtij sezoni.
“Ne duam të sponsorizojmë Çelsin që kërkon të përmirësohet në raport me zhgënjimin e sezonit të kaluar, duam të kemi logon e ”MyClub” të vendosur në pjesën e përparme të fanellës. Do të ishte në të mirë të të dy palëve. Do të ishte diçka e shkëlqyer të kishim emra si Mbape, Mudryk apo të tjerë që të shpërndanin ekskluzive nga stërvitjet në platformën tonë, që i kushtohet të gjithë krijuesve”, tha Majk Ford, pronari i portalit në fjalë.
Megjithatë, raportohet se Çelsi ka refuzuar këtë ofertë, teksa shpreson që të nënshkruajë në ditët e ardhshme me ndonjë kompani tjetër, edhe pse nuk do të përfitojë shifrën që i ofronte faqja me përmbajtje pornografike.
PANORAMASPORT.AL
