Çfarë diference me një vit më parë, kur Jan Bisek erdhi tek Interi si një objekt misterioz dhe një lojtar i panjohur. Por sot që flasim situata është totalisht ndryshe. Gjermani ka përfituar edhe nga ardhjet e vonuara të shokëve të skuadrës për të gjetur formën i pari dhe për të rrëmbyer skenën e fazës përgatitore.
Ai ka konfirmuar rritjen që u vu në dukje në pjesën e dytë të sezonit të kaluar, kur hera-herës dha kontribut për skuadrën e Inzagit. Një fakt që theksohet edhe nga “Corriere Dello Sport”. Bisek është tashmë një realitet dhe në këtë sezon do të ketë një rivalitet të madh me Pavarin. Do të jetë një sezon i gjatë dhe impenjues për të gjithë lojtarët. Bisek është provuar disa herë edhe në qendër, pozicion ku mbylli miqësoren me Çelsin.
Kjo do të thotë se pas Açerbit dhe De Vrajit që me moshën dhe dëmtimet nuk ofrojnë garanci, Bisek është një opsion që bëhet shumë i besueshëm. I riu gjerman është i zoti për të ofruar ndihmën edhe në repartin e avancuar, ashtu siç ndodhi në “Stamford Bridge” kur lindi goli i Turamit. “Kolosi i Këlnit” ishte i duruar, ka pritur momentin e tij dhe ishte gati.
Dhe paradoksi më i madh vazhdon me faktin që për një vit, ai mund të bëhet objekt dëshirash për disa skuadra të mëdha. Nuk do të jetë surprizë, kështu që Interi në muajt e ardhshëm duhet ta “blindojë” me një rinovim kontrate në mënyrë që t’i përmirësojë edhe rrogën.
PANORAMASPORT.AL
